Testdagi xatolar va ularni oldini olish usullari

Hurmatli abituriyent! Imtihon kuni — orzuingiz sari ilk qadam. Ammo hatto kuchli tayyorlangan abituriyent ham ba’zan oddiy xatolar tufayli kerakli ballni qo‘lga kirita olmaydi. Shuning uchun bugun sizga test jarayonida eng ko‘p uchraydigan xatolar va ularni oldini olish usullari haqida batafsil ma’lumot taqdim qilamiz:

Shoshilish va asabiylik

Xatolik sababi: Test boshlanishida asabiylashish va shoshilish tufayli oddiy savollarni noto‘g‘ri bajarish. 

Oldini olish yo‘li: Imtihon boshlanishida chuqur nafas oling, 10 soniya davomida ko‘zingizni yumib, “men bunga tayyorman” deb ichingizda ayting. Dastlab oson savollar bilan boshlang, bu sizga ishonch beradi.

Savol matnini noto‘g‘ri tushunish yoki shoshqaloqlik bilan javob belgilash

Xatolik sababi: “faqat”, “emas”, “barchasi” kabi so‘zlarga e’tibor bermaslik.

Oldini olish yo‘li: Har bir savolni ikki marotaba baland ovozda o‘zingiz uchun qaytarib o‘qib chiqing va so‘ng javob bering. Shubhali bo‘lsa, variantlarni qog‘ozda chizib solishtirish texnikasidan foydalaning.

Javob variantlarini diqqat bilan o‘qimaslik

Xatolik sababi: Birinchi ko‘ringan javobni darhol belgilab qo‘yish.

Oldini olish yo‘li: Har doim barcha variantlarni to‘liq o‘qib chiqing va faqatgina eng to‘g‘ri va to‘liq mos keladiganini tanlang. Bu sizga kamida 5-10 ball qo‘shimcha olib kelishi mumkin.

Vaqtni noto‘g‘ri boshqarish

Xatolik sababi: Qiyin savollarga haddan ortiq vaqt ajratish.

Oldini olish yo‘li: 1 savolga 1 daqiqa, maksimal 2 daqiqa vaqt belgilang. Qiyin savollarni vaqt tugashi oldida qayta ko‘rib chiqish uchun qoldiring.

Javobni belgilashda chalkashish (to‘g‘ri variantni noto‘g‘ri joyga belgilash)

Xatolik sababi: Konsentratsiya yo‘qotilishi va charchoq.

Oldini olish yo‘li: Har 20-25 savoldan so‘ng 30 soniyalik nafas mashqlari bilan miya va ko‘zni dam oldiring. Belgilashni sekin va ishonch bilan bajaring.

Test tugashiga yaqin paytda shoshib qolish

Xatolik sababi: So‘nggi daqiqalarda ko‘p savollar qolib ketishi.

Oldini olish yo‘li: Imtihon vaqtini uch qismga bo‘ling: 1-qismda oson savollar, 2-qismda murakkab savollar, 3-qismda tekshiruv va to‘ldirish.

O‘ziga ishonch yetishmasligi

Xatolik sababi: “Bilmadim”, “ehtimol noto‘g‘ri bo‘lar” degan o‘ylar.

Oldini olish yo‘li: Imtihon oldidan o‘zingizga ijobiy gaplar ayting: “Men tayyorman”, “Mening bilimim yetarli”, “Men buni uddalayman”.